كلمة "ثاتي - ṯꜢty"

 

كتب الاثري عمر صلاح 

كلمة "ثاتي - ṯꜢty" في مصر القديمة مش معناها “وزير” بالمعنى اللي إحنا فاهمينه النهاردة. الترجمة دي تقريبة… ومضلِّلة لو اتاخدت حرفياً.

الـ "ثاتي - ṯꜢty" ماكانش عضو في مجلس وزراء، ولا صاحب حقيبة محددة، ولا مجرد مستشار سياسي، ولكنه كان قمة الهرم الإداري للدولة بعد الملك مباشرة.

يعني كان هو رئيس الجهاز الإداري كله، والمشرف الأعلى على القضاء، والمسؤول عن الضرائب والخزانة، حلقة الوصل بين الملك وكل أقاليم الدولة، وهو اللي بيراقب تنفيذ القوانين على أرض الواقع

يعني ببساطة الملك بيحكم والـ "ثاتي - ṯꜢty" بيدير الدولة من خلال الملك، ولو حبّينا نقرّب الصورة للعقل الحديث من غير مبالغة وزي ما قصدها المصري القديم... الـ "ثاتي - ṯꜢty" في مصر القديمة بيوازي حالياً رئيس الحكومة... يعني مش “وزير” بالمفهوم الحالي، والفرق هنا مهم جداً

الوزير النهارده هو جزء من منظومة، وله ملف محدد شغال عليه، وصلاحياته موزّعة، ولكن الـ "ثاتي - ṯꜢty" زمان كان فوق المنظومة، وصلاحياته شاملة، ومسؤوليته مباشرة قدّام الملك والنظام الكوني نفسه

والسلطة دي ما كانتش فوضى، لأن الـ "ثاتي - ṯꜢty" كان خاضع لفكرة النظام «ماعت» اللي معناها : الحق، العدل، النظام، الاتزان.

وفي نص تنصيب الوزير رخ مي رع مذكور صراحة أن المنصب مش امتياز،

ولكن المنصب أمانة، والخروج عن العدل هو خروج عن النظام.

علشان كدة ترجمة كلمة «ثاتي» على إنها “وزير” وخلاص هو ظلم للمنصب… وبعد عن اللي قصده المصري القديم تماماً، واختزال لمجهودات اللي بنوا الحضارة العظيمة دي اللي ابتكرت مفهوم الدولة قبل ما العالم يعرف يعني إيه إدارة أصلاً.

علشان كدة لازم دايماً نقول بأعلى صوت أن مصر القديمة ما كانتش دولة حجر… ولكن كانت دولة عقل وتجارب وتعلم من التجارب وتراكم خبرات على مدار السنين.