كتب الاثري احمد ابراهيم كرم الله
علي صفحته الشخصية بالفيسبوك ما يلي:
من النادر الكلام عنه فيما يخص تل المقدام والتطرق الي ان العظيم اوجوست مارييت باشا اشتغل فيها حفاير سنة ١٨٦٠ ، وكتب عنها بخط ايده تلت ورقات والحقيقة معرفش هل ده شرف لتل المقدام ولا شرف لمارييت باشا نفسه !
سنة ١٨٨٩ جه جاستون ماسبيرو ونشر تفسير لما كتبه اوجست مارييت باشا ، لكن ما نشره ماسبيرو وبعد الفحص تلاحظ ان هناك سوء تفسير من ماسييرو
حيث انه ذكر بعض اللقايا الاثرية اللي كشف عنها مارييت من المقدام ، لم ترد في سجل اللقايا الاثرية لبعثة مارييت باشا في تل المقدام والمحفوظ في المكتبة الوطنية الفرنسية ومش هنلخبط نفسنا بقا ونخلينا ف الخط بتاعنا
هو ليه اوجست مارييت راح اشتغل ف تل المقدام اصلا ؟!
الاهالي في تل المقدام اكتشفوا جزء من تمثال من الجرانيت الاسود ( يادي الجرانيت يا نااااس ) يحمل اسم الملك نحسي الملك الهكسوسي من الاسرة ال ١٤ وبعد مراجعات مارييت باشا تاكد ان ذات القاعدة اكتشفها قبل كدة جان جاك ريفو ١٨٢٥ ! ومحفوظ دلوقت في متحف بتري في لندن
وبما إن الكلام راح ناحية العظيم اوجوست مارييت وماسبيرو ف نحب نقول ان تل المقدام اشتغل فيها اسامي اجنبية كتير اعظمهم مارييت وتلميذه ماسبيرو وسبقهم جان جاك ريفو وتبعهم نافيل
نيجي بقا لنافيل ، الاسم الكبير في حفاير الدلتا الراجل ده كتب ورقة مهمة ١٨٩٤ انه لما زار تل المقدام شاف بعينه تابوت كبير جدا من الجرانيت الاسود موجود بين البيوت ولما سأل اتقال له ان حفاريين السباخ طلعوه من وسط البيوت !
التابوت يخص موظف كبير من العصر المتأخر اسمه نس ما حسي
وكلام تاني عن تابوت يخص شخص اسمه بادي ما حسي ، اللي قيل انه كان قائد الجيش ! والغريب ان التابوت اختفي وظهر غطاؤه في متحف جامعة بنسلفانيا للاثار والانثروبولجي سنة ١٩٢٦ !
فيه لحد الان غطا تابوت موجود في زمام تل المقدام عليه بقايا نقوش بالخط الهيروغليفي مصنوع من الجرانيت الوردي
التوابيت دي عنصر جنائزي مرتبط بمقابر والتابوتين اللي ذكرهم نافيل مرتبطين بكبار موظفي الدولة ف العصر المتأخر واسماؤهم مرتبط ب ماي حسي
تابوت يعني مقبرة ، مقبرة يعني اثر ثابت وجنائزي
* تل المقدام تم الكشف فيه عن مقبرة الملكة كاروما ام الملك اوسركون الثالث ومعروض محتوياتها في المتحف المصري في التحرير ودي مقبرة ملكية كاملة في عصر مضطرب سياسيا والكشف ده كشف مهم جدا لانها زوجة ملك تاكيلوت الثاني وام ملك اوسركون الثالث
تل المقدام لم تفصح عن اسرارها بعد ، تل المقدام فيها اثار ثابته ترجع للعصور المصرية القديمة مش بس روماني ، تل المقدام مش مجرد مكان علي الهامش بالعكس مكان مهم وملكي ، ولما نتكلم تاريخ ف اللي جاي هنشوف ده حصل ازاي
وبما اننا ذكرنا حفاريين السباخ ، فتلاقي من سوء حظ تل المقدام الاثري علي مدار ال ٢٠٠ سنة اللي فاتت موضوع السباخ ده لان الاهالي كانو بيحفروا بحثا عنه وبسبب كدة كانت الطبقات الاثرية بتتدمر وتتقلب علي بعض وطبعا جمب ان اللي كان بيلاقي حاجة كان بياخدها في عصور ما قبل قانون حماية الاثار
وشبه انقطع خط شغل الاجانب في التل لحد ما مركز البحوث الامريكية كلف بعثة للعمل في المقدام ومشتغلتش كتير
والبعثات المصرية حدث ولا حرج فطاحل منطقة الدقهلية اشتغلوا في المقدام من الجيل القديم لحد اساتذتنا الموجودين لحد دلوقت ولكن المميز في الشغل المصري كان موسم ٢٠١١ لانه كشف مائدة عليها لقب الملك رعمسيس التاني في بعثة حفاير مشكلة من دكتور سعد منصور واستاذنا د.محمد الشافعي واستاذنا يسري قطب
موضوع الحفاير وطبيعة الموقع محتاج بوست كامل لوحده وهو جاهز بس باقي استئذان صاحب محتواه
بشكر صديقي كاسبر علي المعلومات القيمة وبعتذرله عن الايجاز والاجتزاء لان مش كل حاجة ينفع تتقال حفاظا علي حقوق الغير وحفاظا علي مقدرات التل الاثري والحفاظ عليه
Thank you broo.👌 Kacper Laube
(صورة لقاعدة تمثال نحسي محفوظة في متحف بتري في لندن)
(صور من مقتنيات مقبرة الملكة كاروماما ومحفوظة في المتحف المصري بالتحرير)
(صورة لورقة ضمن اوراق كتبها مارييت بخط يده عن المقدام ومحفوظة في المكتبة الوطنية الفرنسية)
......
المصدر
ليست هناك تعليقات:
إرسال تعليق