كتب الاثري عمر صلاح
هل النقش ده في معبد كوم امبو تقويم (كالندر) أعياد ؟! لأ... خالص !
لو دخلت معبد كوم أمبو في أسوان، ووقفت عند صالة القرابين "وسخت حتبو"، هتلاقي على يمينك النقش ده اللي بيتقال عليه كتير جداً إنه
"كالندر أعياد" أو جدول بيحدد مواعيد احتفالات المعبد... بس الحقيقة ؟ الكلام ده مش صحيح إطلاقاً !
النقش ده، وبحسب شرح العالم الجليل د. Ali Abdelhalim Ali – مدير المتحف المصري بالتحرير والمتخصص في الجليفوبطلمي – في محاضرة ألقاها في المعهد الفرنسي للآثار الشرقية IFAO، هو في الأصل :
" جدول توزيع القرابين اليومية على المعبودة "
مش كالندر أعياد خالص !
وبتوضح النقوش إزاي الكهنة كانوا بينظموا تقديم القرابين للمعبودة في المعبد، على مدار السنة، بحيث تكون فيه صفة مختلفة بتتجلى بيها المعبودة كل يوم، وده علشان يتم ضمان تقديم القرابين يومياً بشكل مناسب حسب الصفة.
طيب إيه اللي مكتوب في النقش ده ؟
📌 النصوص A:
بيقول : 🔹 "رن حمت.إس إم هرو بن"
يعني: "اسم جلالتها في هذا اليوم"
ودي بتدل إن كل يوم، كانت المعبودة بتاخد صفة مختلفة – مُقدسة – بيتم بناءًا عليها تقديم القربان المناسب.
📌 النصوص B:
هي عبارة عن رقم اليوم، وقدامه الصفة المُقدسة للمعبودة في اليوم ده.
📌 النصوص C:
تحتوي على الصفة اللي بتاخدها المعبودة كل يوم من الأيام المذكورة في الخانة المقابلة لكل صفة.
✅ ليه ده مهم؟
لأن ده يخلينا نفهم قد إيه الكهنة في مصر القديمة كانوا منظمين وعندهم نظام عبادة دقيق، بيحدد مش بس نوع القربان، لكن صفة/شخصية المعبود أو المعبودة في كل يوم!
علشان كدة النقش ده مش "كالندر أعياد" زي ما بيتقال... بل هو نظام توزيع روحاني وطقسي دقيق لحفظ اتزان العلاقة بين المعبود والإنسان.
الفرق بين الكالندر وجدول التوزيع الطقسي هو إن الأول بيحدد تواريخ احتفالات عامة، أما الجدول ده فبيتكلم عن طقس يومي ثابت منتظم، مش مناسبات موسمية.
شاركوا المعلومة الصح، وافتكروا دايماً إن كل حجر في المعبد بيحكي قصة... ماينفعش نحكيها بدون سند ولكن لازم نفهم لغته الأول بحيث نفسره زي ما المصري القديم قصده.
ليست هناك تعليقات:
إرسال تعليق