دكتور عماد سلامه
اخيرا اتاكدت وعرفت ان السبب الرئيسي لكل الأمراض المزمنة والمناعية مش أكل غلط، ولا تدخين مستمر‼️
وأكبر دليل على كده إن فيه مدخنين كتير صحتهم كويسة، وفيه ناس كتير ماشية على نظام غذائي، وبتسمع كلام الدكاترة اللي انتشروا على السوشيال ميديا وبيتكلموا عن التغذية، وبرضه المرض ملاحقهم‼️
السر في الكورتيزول! ⚠️
تخيّل إنك قاعد على سريرك، وفجأة جات لك رسالة في ليلة هادية وإنت بتحاول تنام بتقولك
«إنت مطلوب بكره للتحقيق معاك»
فجأة هتنط من على السرير، وتسمع ضربات قلبك عالية كأنك جاي من ماراثون! 💓
تحس إن الصداع ملا دماغك، وممكن ساعتها تقيس الضغط تلاقيه مرتفع، والسكر تلاقيه في السماء.
كل ده حصل في جسمك، وإنت مفيش أسد بيجري وراك، ولا خطر حقيقي بيهدد بقاءك في الحياة!
لكن في التوقيت ده، ومجرد ما تعرضت لخطر، حتى لو بسيط، عقلك بيطلق هرمونات ونواقل عصبية لإنذار الحرب الشاملة. 🚨
المشكلة بقى إن الرسالة دي بتتكرر في كل حاجة في حياتنا في العالم الحديث:
أخبار بنقراها بتعكّر مزاجنا…
ناس بنقابلها مستفزة…
خايفين على شغلنا…
بنقارن نفسنا بغيرنا…
عندنا ضغوط مالية مستمرة…
عندنا تحديات بنخلقها لنفسنا، وإحنا اللي بنصنعها من غير سبب واضح…
ماسكين موبايلاتنا ليل نهار، لدرجة إننا ما بقيناش بننام، وبقينا بنفضّل القعدة عليها أكتر! 📱
،الطبيعي إن جسمك بيفرز هرمونات الطوارئ، زي الكورتيزول والأدرينالين، في حالات الطوارئ فقط عشان تخليك تقدر تتعامل معاها 🤫
يعني لو إنت فعلًا بتحارب، أو في حالة مرض، أو عندك خناقة أو مشاجرة كبيرة.
لكن للأسف الشديد، دلوقتي جسمك حصل عنده التباس!
الأدرينالين والكورتيزول بيستمروا في الإفراز طول اليوم، نتيجة الضغط المستمر اللي إحنا فيه..او اللي احنا حاطين نفسنا فيه 🥲
👈الأدرينالين بيرفع ضغط الدم وبيزوّد ضربات القلب،
👈والكورتيزول بيسحب الطاقة من العضلات، وبيخزّن الدهون في منطقة البطن، وبيعطّل عمل الجهاز الهضمي، فيجيلك مشاكل في الهضم، وبيوقف المناعة، وبيحوّل التوتر البسيط لالتهاب مزمن وضبابية ذهنية. 🧠
الجسم بيبدأ يستهلك نفسه، وبتبدأ تتحرق على مدار الوقت.
كل يوم جسمك بيدوب حرفيًا؛ لأنه مش بيتعرض لضغط مفاجئ ويخلص لا ❌
ده بيتعرض لضغط مستمر.
فجأة تلاقي سكرك ارتفع، أو ضغطك ارتفع، أو حصلت لك مشكلة في الجهاز العصبي، أو الجهاز التنفسي، أو في الجهاز الهضمي.
أو تلاقي نفسك بتنسى، أو مش مركز، أو مش عارف تتعامل مع الناس.
نفسك بس تغمّض عينيك وترتاح، لكن مش عارف؛ لأن الكورتيزول والأدرينالين مش مهنّيينك، وحاطينك دايمًا تحت خطر، ومخوّفينك من كل حاجة. 😔
تظهر عندك مع الوقت مشاكل مرضيه@ فتروح تعالجها:
تاخد بقي دواء يخفض السكر…
او تاخد أقراص تهدي الضغط…
او تاخد حاجات لتقلصات القولون والجهاز الهضمي…
وجايز تروح لدكتور يكتبلك دوا مضاد للاكتئاب 😱
حتى النظام الغذائي تبتدي تظبطه، من غير نتيجة حقيقية؛ لأن المشكلة أصلًا في التوتر المزمن اللي إنت بتعيش فيه.
طب ماتيجي نتخلص من الموضوع ده ؟ 👇
وصدقوني لو قدرتوا تعملو الخطوات دي اكتر من ٩٠٪ من مشاكلكم الصحيه انتهت 👌
أولا: التقرّب إلى الله عز وجل 🤲
وهنا دي حقيقة مثبتة علميًا: إن ﴿أَلَا بِذِكْرِ اللَّهِ تَطْمَئِنُّ الْقُلُوبُ﴾ مش مجرد آية؛ دي حقيقة إن ذكر ربنا بيعيد الحالة المزاجية، وبيرفع هرمونات السعادة وهرمونات الاطمئنان والراحة.
ودي أول نقطة: خليك دايمًا مع ربنا، واذكر ربنا، وكلمه وافتكر ان الدنيا مش مستاهله وكده كده خلصانه مهما عملنا ومهما حاولنا ..فاستمتع قدر المستطاع وكبر دماغك
ثانيا التنفس العميق 🌬️
وده بيزوّد الأكسجين في المخ، والجسم،
وبيرسل إشارة فورية للمخ بانتهاء الخطر.
الدليل وإنت بتجري نَفَسك سريع، والأكسجين جوه جسمك قليل، أما لما تهدى وتدخل أكسجين كتير، فده معناه إن الخطر انتهى.
ثالثًا: الحركة الخفيفة المعتدلة 🚶♂️🌿
القصة بقى مش قصة جيم، وإنك تروح تدغدغ وتبني عضلات، لأ!
امشي في الطبيعة، وسط الخضرة، واتنفس الأكسجين لمدة 15 دقيقة في اليوم.
ده بيعيد التوازن العصبي، وبيقلل التوتر الزائد، وبيزوّد إفراز هرمونات السعادة، وبيزوّد النيتريك أكسيد اللي بيوسّع الشرايين والأوعية الدموية.
وعشان كده هتلاقي في كل الدراسات إن الناس الأطول عمرًا والأقل مرضًا بيعيشوا في أماكن مفتوحة، حتى لو بيعيشوا في ظروف مادية صعبة، لكنهم بيعيشوا في مكان مفتوح.
رابعًا: النوم المنتظم 😴
ودي نقطة مهمة جدًا؛ لأن ربنا خلق الكون: ﴿وَجَعَلْنَا اللَّيْلَ لِبَاسًا وَجَعَلْنَا النَّهَارَ مَعَاشًا﴾.
يعني تسعى طول اليوم، وبالليل تنام.
فده وقت الاستشفاء، اللي بيخلي الكبد والجهاز العصبي يخفضوا الكورتيزول بشكل تلقائي.
لذلك لو نمت تعبان، الطبيعي تصحى تلاقي نفسك كويس.
خامسًا: الضحك والتواصل مع الآخرين 😄
قابل أصحابك اللي بتحبهم، والناس اللي بترتاح معاهم.
خد عيالك بالحضن، وقرّب من الناس اللي بيريّحوا أعصابك، وابعد عن الناس اللي بيرفعوا ضغطك. ❤️
كل الأمور دي بتزوّد هرمونات السعادة، وبتخفض هرمونات الضغط والتوتر، حتى لو كان اللعب والضحك ده مع حيوانات أليفة. 🐾
سادسًا: حبة حاجات هتاخدها في يومك، هتفرق معاك كتير جدًا
✅الاشواجندا ، ودي من أحلى الأعشاب المكيّفة، بتساعد الجسم يتحمل الضغوط ويديرها، وتخفض الكورتيزول، وتحسّن المزاج.
✅اللافندر والبابونج، ودي عشان فيها زيوت طيّارة بتهدي الجهاز العصبي المركزي، وبتقلل الأرق.
✅المغنيسيوم، وده مهم جدًا لاسترخاء العضلات والأعصاب، وبيحسّن إنتاج هرمونات السعادة والرضا.
✅والشاي الأخضر كمان فيه مادة الثيانين، اللي بتحسّن المزاج. 🍵🌿
وفي النهاية…
قلّل متابعة الأخبار.
اقفل إشعارات الموبايل.
خصص وقت لهواياتك.
اعمل حبة تمدد بسيط.
كفاية ضغوط!
لأن كل ضغط بتاخده النهارده بيستنزفك، وده بداية كل الأمراض.
ليست هناك تعليقات:
إرسال تعليق