كتب الاثري باسم ابو زيد
إيه هي الطرق اللي لجأ لها المصري القديم في تأمين و حمايه المقابر ؟!
المصري القديم كان على علم و على درايه أنه هيتحاسب بعد ما يموت في العالم الاخر و عشان كده كان لازم اللي بيصمم المقبره يبتكر طرق تمنع اقتحام حجره الدفن و يحمي المومياء و أي حاجه تتحط مع المومياء
اول محاوله لحمايه حجره الدفن ظهرت في مصاطب الاسره الاولى لما عملوا حجره الدفن في قاع بير منحوت كان عمقه من مترين ل 3 متر بعد كده قفلوا الحجره نفسها بحجر ضخم
و في بدايه الاسره التالته لجأ المصري القديم لطرق تانيه و خليني اعرفك عليها ..
أولها التابوت الخشبي بتاع المتوفي اللي كان مابيقدمش الحمايه للمومياء فإتغير و ظهر التابوت الحجري في الاسره التالته و ساعتها كانت معظم التوابيت من الحجر الجيري
أما بالنسبه لكبار الشخصيات في نفس العصر ده فتوابيتهم كانت من أحجار أشد في الصلاه زي الجيرانيت و الكوارتز
و عايز اقولك أن التوابيت المصنوعه من الحجر الجيري فشلت في حماية المومياء فكان من السهل تكسير غطا التابوت أما التوابيت المصنوعه من الجيرانيت و الكوارتز فكانت بتمثل تحدي صعب ل اللصوص اللي اكتفوا بزحزحه غطا التابوت بالقدر اللي يسمح بالوصول للمومياء
تاني طريقه و هي وضع التابوت في فتحه في ارضيه غرفه الدفن بحيث يوصل لحافه الحفره زي اللي في هرم خفرع عشان لو حد عرف يميل التابوت ساعتها يسقط الغطا باللي فيه
الاسلوب التالت بيرجع لعصر الدوله القديمه و ده بيعتمد فيه على زحلقه الغطا على طول التابوت اللي بيدخل معاه في فتحه في نهايته
و بيسقط وتدين من المعدن من اخرام في الغطا جوه اخرام مقابله في حافه التابوت زي تابوت خفرع و تابوت منكاورع
الاسلوب الرابع بيرجع لعصر الدوله الحديثه اللي زاد فيها حجم التابوت عن طريق أنه كان بيحاوطها بأطنان من الجيرانيت و يحط المومياء في اكتر من تابوت من الخشب جوه كذه مقصوره يعني بيحط المومياء جوه تابوت و يحط التابوت في تابوت و يحط التابوتين اللي في بعض في تابوت كبير بعد كده يدخلهم في مقصوره صغيره اللي بتدخل في مقصوره كبيره اللي بيدخلوا كلهم في مقصوره اكبر زي ما شوفنا في مقبره توت عنخ امون
اسلوب خامس ظهرلك من الاسره الرابعه لحد الاسره السادسه و هو ابواب بتتزحلق و سدادات حجريه جوه ممرات ألاهرام اللي كان من الصعب تكسيرها بشكل خاص الممرات اللي بتوديك على حجره الدفن
و كمان هتلاقي أن الهرمين بتوع امنمحات الرابع بالذات الهرم الشمالي اللي فيه بابين الاول وزنه 24 طن و التاني 42 طن
الاسلوب رقم 6 عباره عن ممرات تمويه و ابواب سريه لتضليل اللصوص زي هرم امنمحات التالت في هواره
و في بعض الأحيان كانوا بيعملوا غرفه دفن كاذبه لخداع اللصوص أما الحجره الحقيقيه فكانت بتبقى على عمق ابعد
الاسلوب السابع بيرجع لتحتمس الاول اللي قالك أنا هنقل المقبره في وادي منعزل ورا منحدرات الدير البحري في "وادي الملوك" و كان هو اول واحد يدفن هناك .. ساعتها كلف المهندس بتاعه "انيني" يصمم له المقبره و قعد شهرين يدور على مكان ناحيه الغرب لحد ما لقى مكان بين الجبال يصلح أنه يكون المثوى الاخير لجثمان تحتمس الاول
قصه نحت مقبره تحتمس الاول موجوده في مقبره المهندس انيني اللي كتب : وحيدا قام بقياده هؤلاء الذين حفروا مقبره جلالته دون أن يراهم أحد أو يسمعهم أحد ..
اسلوب رقم 8 و فيه تم تزويد المقبره الملكيه في البر الغربي ب بير يسد الطريق على الغرفه اللي قبل غرفه الدفن و يسد برضه الطريق قدام مياه السيول اللي ممكن تتسرب جوه غرفه الدفن في طفره هندسيه مزاجها عالي
اسلوب رقم 9 اسمه اسلوب كاميرات المراقبه أو تقدر تسميه اسلوب فضيحه اللصوص ام جلاجل ..
في الاسره 22 و 26 كهنه المعبد قالوا لك ماهو لو احنا عملنا المقبره في وادي الملوك المنعزل ممكن اللصوص تروح تفتح المقبره هناك و يكسروا من غير ما حد يسمع لهم حس .. احنا هندفن الملك في ساحه المعبد الرئيسيه عشان تبقى المقبره تحت عينينا زي ما حصل في تانيس
اسلوب رقم 10 و فيه اتحقق للمصري القديم مراده في حمايه المقبره و الجثه عن طريق كذه حاجه عملها في المقبره .. اسمع بقى
حفر بير اتساعه 10 متر و عمقه 30 متر و في قاع البير صمم حجره الدفن اللي كانت مربعه و سقفها حجر فيه 3 فتحات بيتقفلوا بأواني فخاريه بحيث تكون قاعده الأواني الفخاريه لتحت و بتتثبت بملاط بعد كده يحفر بير موازي اتساعه أقل بيوصل لحجره الدفن برضه عن طريق دهليز ضيق افقي يتسد ب 3 كتل حجريه ضخمه
و يملى البير الاولاني بالرمل لحد نهايته و بعد ما يخلصوا مراسم الدفن و يقفلوا التابوت ع المومياء يقوموا كاسرين اواني فخارية قبل ما يمشوا من غرفه الدفن فيدخل فيها رمله لحد ما تملاها و بعدها العمال بيمشوا من غرفه الدفن عن طريق الدهليز الضيق اللي ف البير التاني و أثناء ما هم خارجين بيقفلوه ب 3 كتل صخرية كبيره و بيطلعوا بالحبال من البير التاني الموازي للبير الاول و بعد ما يخرجوا يملوا البير اللي طلعوا منه ده بالرمل برضه
كده لو حاول اي حد يدخل المقبره لازم يزخل من البير الموازي بعد ما يزيح الرمل و لو زاح الرمل ده لو يعني .. هيدخل في الدهليز الضيق هيلاقي قدامه 3 كتل صخرية و لو زاح ال 3 كتل صخرية ده لو يعني .. هيلاقي قدامه طوفان من الرمل اللي هتنهال عليه من السقف و احتمال يندفن تحتها زي بالظبط مقبره "امون تف نخت" في سقاره .. شوفت بقى
اخر اسلوب .. اللجوء للسحر
لجأ المصري القديم للسحر كخط تاني يدافع بيه عن مقبرته و ده زاد في العصر المتأخر كمان اللي درس اثار مصريه عنده معلومه إن الفصل 137 من فصول كتاب الموتى كان بيتكتب على أربع نماذج من الطوب الصلصال و كانت النماذج دي بتتحط في جدران حجره الدفن
عندك كمان التمائم اللي كان غرضها حمايه المتوفي
عايز اقولك أن اللجوء للسحر في حمايه المتوفي كان عباره عن تحذير وبس .. يعني ماكانش بيحصل اي حاجه لو حد دخل المقبره
طب هو لجأ للسحر و العبارات التحذيريه ليه ؟
عشان المصري القديم كان إيمانه قوي بالعالم الاخر و بكتابات كتاب الموتى
عباره تحذيريه زي ايه ؟ .. زي اللي كانت مكتوبه فوق باب مقبره توت عنخ امون
"الموت سوف يمس بجناحيه من سوف يقلق فى أبدية الملك الذى يرقد فى هذا المكان"
لو شايف إن البوست كان دسم و نال اعجابك .. اعمل شير و خللي اللي مايعرفش يعرف .
ليست هناك تعليقات:
إرسال تعليق