الهرم الغذائي اللي درسناه تم تغييره علي النخو التالي:
يوم 7 يناير نزلت التوصيات الأمريكية الجديدة للتغذية (2026-2030)، والحقيقة إن فيها انتصار كبير لمدرسة الأكل الحقيقي والطبيعي (Real Food)
أخيراً العالم بيعترف ان جودة الأكل أهم مليون مرة من حساب السعرات....زمن إننا نتعامل مع جسمنا كأنه آلة حاسبة انتهى بنقول من زمان Calories are not created equal.. الحمد لله وصلنا مرحلة إننا نفهم تأثير الأكل ده على هرموناتنا وصحتنا
إيه أهم التغييرات اللي حصلت؟
1️⃣ البروتين أخد حقه أخيراً
التوصيات رفعت حصة البروتين لـ 1.2 جرام (لكل كيلو من وزن الجسم الطبيعي )، بعد ما كانت محبوسة في رقم 0.8 جم بقالها سنين
البروتين بقى هو حجر الأساس في الوجبة عشان الشبع والبناء العضلي والحرق
2️⃣ الميكروبيوم.. البطل الجديد
لأول مرة بنشوف تركيز صريح على صحة الميكروبيوم (بكتيريا الأمعاء) الكلام مبقاش بس الخضار والفاكهة مهمين عشان الفيتامينز .. الكلام بقى أكل البكتيريا النافعة عشان تضبط مناعتك ومودك ..... وده معناه إن الخضار والفاكهة والألياف دورهم بقى محوري أكتر من أي وقت فات
3️⃣ النشويات رجعت ورا
النشويات والحبوب) رجعت لحجمها الطبيعي كل باعتدال (Eat in moderation)، مبقتش هي قاعدة الهرم ولا نص طبقنا زي الاول
وطبعا الأولوية لمصادر النشويات الطبيعية مش المصنعة
4️⃣ الأكل المصنع (UPFs)
أي حاجة في أكياس وعلب ومواد حافظة اتصنفت رسمياً كـ عدو صريح للصحة الأيضية ولازم تخرج من حساباتنا
بس عشان نكون منصفين واحنا بنحكي عن التوصيات الجديدة .. لسه فيه لغز كبير!
الجايدلاينز بتحط الدهون الطبيعية واللحوم والزبدة ومنتجات الألبان كاملة الدسم في قمة الهرم كأكل صحي وطبيعي ومفضل وبتقول للناس تبطل تخاف من الدهون وفي نفس الوقت لسه متمسكة بشرط إن الدهون المشبعة لا تتعدى 10% من السعرات؟!
دي معادلة مستحيلة عملياً.. وكأنهم بيقولوا كُل زبدة ولحمة واشرب لبن كامل الدسم .. بس ماتكلش!
مفيش كلام واضح ع الزيوت النباتية المصنعة زي عباد الشمس والذرة لكن الأكيد أنها مبقتش الاختيار الاحسن ولسة مش عارفين رأي الجمعية الأمريكية للقلب AHA في قصة الدهون المشبعة والزبدة والسمنة
مازال زيت الزيتون هو الكينج بصراحة لما نكلم عن الدهون
الحاجة الوحيدة اللي الموقف فيها كان حاسم وصادم هي السكر المضاف
مفيش حاجة اسمها "ليك 10% سكر مضاف زي زمان.. القاعدة دي اتلغت
الرسالة الجديدة واضحة (Zero is best) كل ما كان قليل، كل ما كان أحسن لصحتك
والكلام ده ينطبق على الكحوليات
وفي جملة صريحة أنا طول عمري بحبها بخصوص العصاير والمشروبات الغازية والمشروبات اللي كلها سكر
Don't drink your calories
التغيير اللي حصل ده خطوة عظيمة، خطوة بتعز. الصحة وبترجعنا ناكل اكل طبيعي بس واحدة واحدة في الدهون أيوة مش بعبع بس مش حنشرب سمنة
الصحة مش تطرف.. الصحة توازن
خليك في المعادلة دي ومش حتغلط
١- بروتين محترم (احسب لنفسك الـ 1.2 جم دول واهتم بيهم).
٢- خضار وفيتامينات (عشان صحة الميكروبيوم والمناعة).
٣- سكر ومصنعات (ابعد خالص.. دول العدو الحقيقي).
٤- دهون (Go slow).. خليك معتدل، استخدم الدهون الطبيعية عشان تطبخ وتحلي طعم أكلك، بس لا تمنعها ولا تبالغ فيها.
هي دي الصحة باختصار.. نرجع ناكل "أكل حقيقي" ونبطل نعد سعرات.
ليست هناك تعليقات:
إرسال تعليق