كتب الاثري عمر صلاح
في مرة كنت ماشي في متحف التحرير… وفجأة شوفت باب وهمي منقوش عليه ألقاب بالهيروغليفي… ولما دققت فيها لقيت أنها شهادة حب واحترام من راجل لمراته… من آلاف السنين !
الباب الوهمي ده بتاع واحد إسمه "ني كاو رع" ومراته إسمها "إِحات"… وعليه لقب غاية في الجمال:
"إماخيت خِر هاي.إس"
(ỉmꜣḫyt ḫr hꜣy.s)
يعني إيه؟
يعني "المُبجَّلة عند زوجها"… أو "اللي ليها مكانة وحضور في قلب زوجها".
🔍 لو فككنا كلمات اللقب هنلاقيها عبارة عن :
· إماخيت (ỉmꜣḫyt): المُبجَّلة، المُكرَّمة، اللي ليها قيمة ومكانة.
· خِر (ḫr): عند، في حضور، في معية.
· هاي (hꜣy): الزوج، الرفيق، الشريك.
· .إس (s.): ضمير مؤنث " ـها"… يعني زوجها هي.
يعني اللقب كله معناه: المُبجَّلة في حضور زوجها.
🧐 ليه اللقب ده مهم ؟
· لأنه لقب رسمي جنائزي، بيتكتب على الأبواب الوهمية، اللي بتُعتبر بوابة بين عالم الأحياء وعالم الأموات... يعني الراجل بيشهد قدام معبوداته إن مراته مُبجَّلة عنده، مش بس في الدنيا، في حياته الأبدية كلها.
· مراته "إحات" كانت كاهنة لـ حتحور، يعني ليها مكانة دينية واجتماعية عالية.
· الراجل هو اللي بيبجّلها مش هي اللي بتطلب، ولا بتشتري، ولا بتستجدي… هو اللي معترف بمكانتها ومُقدّرها.
💡 وده يقولنا إن المصري القديم كان بيحب ويحترم مراته… وكان بيعترف بمكانتها… وكان بيبجّلها… يعني الست المصرية القديمة كانت مُكرَّمة مش مُهانة أو مظلومة.
دي شهادة من آلاف السنين… على أثر مصري قديم… بتقول لكل الأجيال أن : الست المصرية… كانت مُبجَّلة عند زوجها.
